KISSME 好用推薦產品

LingLing好用推薦：講真我一向都係用開 KissMe 隻睫毛膏，真係捽都捽唔甩嗰種，落雨流汗都完全唔郁，穩到爆。但就係因為佢太持久，以前卸妝卸到眼紅紅，成日都要搽幾次眼唇卸，捽幾捽先甩得晒，搞到眼皮都痕痕哋、仲甩埋幾條睫毛。 直到有次喺藥妝店見到 KissMe 自家出嘅眼睫毛專用卸妝液，諗住反正都係同一個牌子，試下都無妨。點知⋯⋯一試成主顧，真係改變咗我對卸睫毛嘅痛苦回憶！ 佢係用刷頭設計，好似透明睫毛膏咁樣，一掃就可以塗勻成排睫毛，完全唔會入眼、亦唔會刺激。等大概 30 秒～1 分鐘，再用棉花輕輕抹走，啲睫毛膏就自己「溶」咗咁樣，滑一滑就甩晒，完全唔使大力捽，仲可以順便清埋眼線位～ 我最鍾意係佢卸得乾淨之餘，又唔會焗眼或者搞到油笠笠，清爽又舒服，連戴con都無問題。用完眼都冇痕、冇紅腫，真心對眼敏感啲嘅人都啱用。 依家我每次化濃妝、或者夾得好翹嘅睫毛，一定都會用返呢支卸妝液。特別係趕住洗面又唔想整傷眼嘅時候，佢就幫我慳返唔少時間。 總結：溫和、有效、唔刺激又唔焗眼，卸妝新手或者重度睫毛膏使用者都值得試一試～我自己已經回購咗第二支啦，放工後要輕鬆落妝，佢真係功不可沒！

YiN好用推薦：一定係史上最強睫毛卸妝產品，冇之一。香港咁熱咁潮濕，冇可能唔用防水睫毛膏。我本身都用開kissme嘅防水睫毛膏，有時去睇live我仲會喺底用超強嘅睫毛底霜，將啲睫毛定到好似鐵線咁硬。到要卸妝嘅時候就知有幾痛苦，用眼唇卸妝液敷幾耐都摸到啲睫毛係硬嘅，唔小心入眼又唔舒服，未遇到呢枝之前我通常抹到冇色就放棄，由得啲睫毛硬硬地。佢入面就係一枝冇刷頭有坑嘅棒，啲卸睫毛液卡喺啲坑度，當平時搽睫毛咁刷上啲睫毛度，基本上你一眨眼啲黑色已經印哂落下面，用棉花一抹就乾淨，有時未夠的話重覆多一次呢個動作就一定卸到。 建議大家習慣掃完一次抹乾淨枝棒先放返入去，如果唔係好快成枝都會變黑。

Kitty 好用推薦：KissMe睫毛膏真係眼妝救星！我本身睫毛比較短，平時用開其他牌子好易塌落嚟，但呢支刷頭設計好貼心，可以精準勾到每根睫毛，一刷上去即刻有纖長+濃密效果，仲唔會結塊𠵱！最驚喜係持久度超班，我成日眨眼又出油，但撐足成日都冇暈開，放工對眼依然好有神～卸妝方面都算容易，用支溫和嘅眼唇卸妝液敷多陣就ok，完全唔會扯甩睫毛。我呢隻係特別版，乾燥玫瑰色，刷上去顯得眼神好溫柔，幫眼妝加分不少，而家化日常眼妝一定揀佢，就算想加強妝感疊擦兩層都依然自然，真心推薦畀鍾意偽素顏或者韓系妝容嘅姊妹！

YYeman好用推薦：Kissme防水纖長睫毛膏實測！香港悶熱天都頂得順 講真！呢支真係睫毛膏界嘅長跑冠軍🏃 我帶住佢經歷30℃+潮濕天 落雨流汗都完全冇化開～ 刷頭係微弧形設計 連眼頭眼尾啲短毛都刷到 膏體偏乾身 唔會一抽就結塊 新手都可以刷出根根分明效果✨ 纖長效果確實夠誇張 薄薄刷兩層已經變太陽花 想要自然妝感刷一層就夠 重點係完全零熊貓眼！！！ 不過佢個防水功能太強勢 落妝要用專門眼唇卸 敷足10秒先卸得乾淨 （試過偷懶用卸妝水 搓到眼皮痛都未卸曬😭） 持久度：★★★★★ 纖長效果：★★★★☆ 易卸度：★★☆☆☆ 性價比：★★★★☆ 總結：海邊/婚禮/流淚場合必備神器 日常用建議買棕色版更柔和～

shinchan好用推薦：以宜家天氣 (春天) 嚟講，我嘅肌膚係混合偏油。眼皮即使定咗妝都仲會出啲油，所以眼部彩妝要用持久同抗油水嘅。 我一路有化開淡妝，但從來都冇研究過畫眼線嘅秘技，因為手殘🤣直到最近開始想學化靚嘅眼妝，第一次挑戰就膽粗粗買咗呢枝眼線液。好多YouTuber同身邊嘅朋友都推介，所以即使眼線液難用都想嘗試。我買嘅係Kiss Me Heroine Make 纖細眼線液 (03 深啡黑色)。佢係一隻深啡帶黑嘅顏色嚟，正如色號所形容🤣買佢嘅原因係因為黑色會太兇惡，啡色又太普通。呢枝眼線液好順滑，完全冇斷墨，筆頭好尖好幼，可以好精準咁畫到一條幼嘅眼線出嚟。持久又抗油，非常推薦🫶🏻我朝早7:30畫好條眼線 (冇定到妝)，放工後食完飯去咗飲酒，到夜晚11:30先返到屋企。眼影已經甩晒，唯獨係條眼線仲留咗喺度！好癲，大推！下面幅圖可以見到雙眼皮皺摺位堆積咗嘅眼影粉，雖然條眼線有少少甩，但正常社交距離都仲清晰可見！因為第一次畫想試吓佢有幾持久，所以冇定到妝。之後/夏天我會再努力定妝，等佢可以更持久🤣價錢: 10/10 持久: 10/10 抗油: 10/10 回購: 100/10💕

Poyobb好用推薦：市面上出咁多五彩繽紛嘅眼線液，其實最務實一定係用返黑、啡、灰色，百搭顏色✏️ 呢支係Kiss me Heroine Make 系列極緻持色纖細眼線。筆尖十分幼細，毛筆在十分尖細，只有超細0.1mm，即使貼住睫毛填空白位都好容易，上眼線可以描繪到好完美既弧度粗幼，非常乾脆俐落。如果新手想用眼線液買佢就練習最好。 墨水出色均勻，沒有化開 ，顯色強。市面眼好多眼線液嘅黑色同啡色相差不大，超推薦我手上呢05灰啡色，添加返眼神之餘，又帶點柔和感🫧 即使上翹形眼線or平衡延伸眼線，當天鍾意邊個造型都可以使用。一直以來用眼線筆描繪內眼線，會痕到流眼水，反而用返呢支眼線液就冇問題。 持久力強，而且係寫住super water proof。用於內眼線全日都沒有溶妝，夏天去沙灘眼妝淨係用眼線液同睫毛液，眼線液係唔會甩，唔會化開。但一用卸妝油就已經寫卸好乾淨沒有殘留。 好多開架日本品牌嘅眼線液好好，Love Liner dolly wink，但最後都係揀返Kiss me 💕

Kitty 好用推薦：KissMe睫毛打底霜！唔使100蚊，由朝撐到晚嘅睫毛鐵柱係咁煉成嘅！ 喂！各位姊妹，想同大家分享吓我一路用左n支都肯回購嘅開架眼妝神物 —— KissMe持久捲曲睫毛打底霜！講真，我對睫毛膏要求好簡單：夠翹、夠持久、唔暈妝、唔蟑螂腳！呢支嘢？真係冇得輸！ 之前用開某大牌睫毛膏，下晝已經變落湯雞，暈到變熊貓！見到好多日本妹同台灣YouTuber都狂推KissMe呢支打底，話係油眼救星、塌睫毛恩物，所以買來試下，一試真係不得了！ 支膏體係半透明灰黑色，入面有啲好細好細嘅黑色纖維。刷頭係彎彎哋嘅，好貼眼型，連眼頭眼尾啲短毛毛都輕易掃到！質地唔會太濕笠，亦唔會一嚿嚿，乾得幾快吓。 我嘅使用步驟好簡單： 1. 夾睫毛（夾到最翹！） 2. 即刻！記住係即刻！掃上呢支打底膏，由根部 Z 字形向上掃，重點加強根部。 3. 等10-15秒左右，等佢乾透、定型（呢步好重要！）有需要的話可以再夾一次睫毛。 4. 再疊加上你鍾意嘅睫毛膏（我通常會再上一層黑色睫毛膏加強效果）。 💥 效果點？驚艷位喺邊？ 1. 捲翹度爆燈！💥 真係冇誇張！佢個定型能力超強！我啲天生向下生嘅直毛，夾完再上佢，真

wcm好用推薦：試過唔同款睫毛膏 我依然最鐘意呢款 不以暈染 上次去玩水上樂園都係用呢支睫毛膏 都冇暈染🫶🏻

Emma W好用推薦：睫毛液能夠持久保持妝效，即使在潮濕夏天、或者落雨出汗時，都不容易晕染。 另外，比一般睫毛液，其令效果更長更纖細，又不易起塊狀凝固物，增強了眼部的立體感。 最怕就係防水產品難卸妝，但其唔會有依個難處。用濕左化妝棉輕抹兩三下，就已經卸咗妝，不會對睫毛造成傷害。 適合肌膚：任何 成效度：4/5

Kmggigi好用推薦：KISS ME-Heroine Make Long Stay Sharp Gel Liner係一款超易上手嘅眼線筆， 無論新手定化妝高手都啱用！✨ 眼線筆筆尖設計非常順滑好畫， 輕輕一畫就能畫出流暢嘅線條， 對於化妝新手嚟講，使用起嚟特別容易掌握，畫眼線再唔怕手殘！ 雖然呢款眼線筆用落非常好， 但要特別小心蓋筆蓋嘅時候要確保冇壓到筆尖， 避免筆毛出現分叉嘅情況，否則可能會影響之後嘅使用體驗。 上一支用到一半出現分叉嘅情況，確實有啲麻煩， 所以保存時務必要注意。 除咗好畫易用之外， 呢款眼線筆嘅持久度亦非常出色， 畫出嘅線條唔易暈染， 可以輕鬆保持一整日嘅妝容完整， 對於眼妝要求高嘅人嚟講係非常可靠嘅選擇。

羅小白好用推薦：呢個牌子防水防汗嘅效果從來都冇令我失望過，同埋用落都幾好，好上色，同埋好容易上手，不過佢嘅筆芯實在太幼，稍為用力都會壓斷咗支筆芯，亦都有可能係因為我唔識用啦，我畫一條眼線都可以壓斷兩次，反而同牌子另一個系列就冇呢個問題，建議可以將支筆芯整得硬啲，新手會容易啲上手。

Lukeee好用推薦：Kiss Me 水漾亮澤繪形唇釉筆，使用方便，唇釉滋潤度也足夠，亮澤感也不錯，都顯色👍🏻

Anna好用推薦：初時都唔係好信朋友的介紹，但誠意拳拳下，我還是買咗支黎試下，一試之下，真係覺得非常滿意，我買既係02色號，回購咗兩支，真心推薦俾各位朋友仔。

sammiimelda好用推薦：呢款護手霜主要係買俾我屋企嗰位用嘅 因為佢唔想要太重香味嘅護手霜 而且佢話呢個包裝望落去好Pro 😂 佢嘅質地係比較重身 似係膏狀 完全冇香味 延展性唔高 但因為藥用護手霜 主要都睇返係功能上面 的而且確 冬天乾裂嘅話完全係滋潤到嘅

波娜好用推薦：好好用！又平！（$20一枝） 雖然細細枝 但係因為佢潤 所以咇少少都夠用～ 佢最好嘅就係潤得嚟又唔笠！ 搽完大概半分鐘後就吸收 可以掂keyboard/文件都唔會hi到周圍黏笠笠～（我之前用其他牌子會搞到啲紙有個油印） 大推 會回購

Karman28好用推薦：用到連logo都甩哂，都未用哂，但應該係時候買支新。 呢支係朋友推薦，當用睫毛液失手時，靠它就能去除失手的部份，唔洗成個妝卸左佢。 同埋佢個設計十分易用。

格仔餅公主好用推薦：懶人岩用，連cotton pad都唔洗ready已經可以卸哂D mascara ，剩係化左mascara用佢卸慳水慳力又唔會傷眼，同佢入眼都唔會嗱眼架