shu uemura 植村秀

unlimited 無限輕透持妝粉底液 (小方瓶 2.0)

感謝@cosme比機會試用呢支新粉底，就係植村秀出名嘅小方瓶升級版——Ultime Infinite 2.0。用咗一排，真係要同大家分享下個感覺！

首先，佢個妝效真係好靚，霧面微光！搽上臉唔係死實嘅全啞光，而係帶住好細緻嘅自然光澤，望落個膚質好似本身咁好，有種偽素顏嘅感覺，好高級。

質地方面，一推開就知正，好薄身貼面，完全冇嗰種戴住面具嘅厚重感。就算係而家咁濕熱嘅天氣，用佢都唔會覺得黐立立，個妝好似同自己塊面融合咗一樣。最驚喜係，佢雖然係偏向霧面，但一啲都唔拔乾，我呢個混合肌（T字位油，面頰有時會乾）用得好舒服，冇出現乾到起皮嘅情況。

講到遮瑕度，我覺得屬於中等。如果你追求完美零瑕疵，可能要疊多一層，或者用返專用嘅遮瑕膏。對我嚟講，普通嘅毛孔、少少泛紅同暗啞，佢都修飾得七七八八，出嚟個妝感好自然。不過要提一提，好似我嘴角啲暗沉位，就真係要另外重點遮一遮先可以完全遮得住，如果唔係會透返少少出嚟。

最後係持妝度，呢方面我要比個Like！我朝早九點化好妝，到傍晚收工，個妝都仲Keep到七八成。T字位會出油，但唔會溶到一撻撻，用紙巾印一印，補少少碎粉又好似新嘅一樣，冇出現嚴重暗沉嘅問題，個底妝依然係貼服嘅。

總括來講：
呢支小方瓶2.0真係好適合而家嘅天氣。如果易出油或者瑕疵比較多，就可能要再加強定妝同遮瑕。但對於一般日常出街、返工，想要個靚得嚟又唔使太費神嘅底妝，佢絕對係個唔錯嘅選擇！